હે ભક્તો ! હિન્દુસ્તાન એ તીર્થોનો અણમોલ ખજાનો છે. વિશ્વના અનેક દેશોમાં ભૌતિકતાની બોલબાલા છે, પરંતુ ત્યાં તીર્થો જોવાં મળતાં નથી. ત્યાં મોટી મોટી ૬૬૭૧ કિલોમીટર જેટલી નાઈલ જેવી નદીઓ લાંબી છે; પણ એને કોઈ તીર્થ કહેતું નથી, કારણ કે તેના પાણીમાં પ્રગટ પ્રભુએ ક્યારેય સ્નાન કરેલ નથી. પરંતુ વડતાલધામમાં આવેલ ગોમતી તળાવ છે, તેમાં તો પ્રગટ ભગવાન સ્વામિનારાયણે અનેકવાર નાન કરી તેને વિશેષ તીર્થત્વ આપેલ છે, તેથી તેને તૂલ્ય નાઈલ કે એમેઝોન જેવી લાંબી લાંબી નદીઓ કે વિક્ટોરિયા અને મિસિગન જેવાં વિશાળ સરોવરો આવે નહિ.

હે ભક્તો ! ભારત દેશની પવિત્ર ભૂમિમાં ભગવાન અને પવિત્ર સંતોનાં પાવન પગલાંને કારણે ઠેર-ઠેર તીર્થ-ક્ષેત્રો પથરાયેલાં છે. એવાં તીર્થોમાં પણ અમુક તીર્થો તો એવાં છે કે જેનું વર્ણન શેષજી પણ હજારમુખે વર્ણન ન કરી શકે અને એ તીર્થ એટલે વરતાલધામ ! કારણ કે વડતાલ ગામમાં સ્વયં પ્રગટ પ્રભુ ભગવાન સ્વામિનારાયણે ૪૫ વાર પધારી આખા ગામની ધરતીને પોતાના પાવન પદારવિંદથી પવિત્ર કરેલ છે. તેના કારણે વરતાલ ગામને વડતાલધામ અને તીર્થરાજ પણ કહેવાય છે.